ಪ್ರಕೃತಿ ಮತ್ತು ಜನಜೀವನ ಉಳಿವಿನ ಹೋರಾಟ: ಬೇಡ್ತಿ–ವರದಾ–ಅಘನಾಶಿನಿ ನದಿ ಜೋಡಣೆ

ಶಿರಸಿ: ಪಶ್ಚಿಮಘಟ್ಟಗಳಿಗೆ ಮರಣಶಾಸನವೆಂದು ಪರಿಗಣಿಸಲಾದ ಬೇಡ್ತಿ–ವರದಾ–ಅಘನಾಶಿನಿ ನದಿ ಜೋಡಣೆ ಸೇರಿದಂತೆ ಎರಡು ಪ್ರಮುಖ ಯೋಜನೆಗಳ ವಿರುದ್ಧ ಶಿರಸಿಯ ಎಂ.ಇ.ಎಸ್. ಕಾಲೇಜು ಮೈದಾನದಲ್ಲಿ ನಡೆದ ಬೃಹತ್ ಜನಸಮಾವೇಶ ಅಪಾರ ಜನಸಾಗರದೊಂದಿಗೆ ಯಶಸ್ವಿಯಾಯಿತು. ಸುಮಾರು 7000 ಕುರ್ಚಿಗಳು ಭರ್ತಿಯಾಗಿದ್ದರೆ, ನೆಲದ ಮೇಲೂ ಸಾರ್ವಜನಿಕರು ಆಸೀನರಾಗಿದ್ದು, 20 ಸಾವಿರಕ್ಕೂ ಅಧಿಕ ಪರಿಸರ ಕಾರ್ಯಕರ್ತರು ಭಾಗಿಯಾಗಿದ್ದರು. ಎಲ್‌ಇಡಿ ಪರದೆಗಳ ಮೂಲಕ ನೇರ ಪ್ರಸಾರ ವ್ಯವಸ್ಥೆ ಮಾಡಲಾಗಿತ್ತು. ಸ್ವರ್ಣವಲ್ಲಿ ಮಠದ ಶ್ರೀ ಗಂಗಾಧರೇಂದ್ರ ಸರಸ್ವತಿ ಮಹಾಸ್ವಾಮೀಜಿಗಳು ಈ ಯೋಜನೆ ಅತಾರ್ಕಿಕ, ಅವೈಜ್ಞಾನಿಕವಾಗಿದ್ದು ಸಮಗ್ರ ಪ್ರದೇಶಕ್ಕೆ ಶಾಶ್ವತ ಹಾನಿ ಉಂಟುಮಾಡಲಿದೆ ಎಂದು ಎಚ್ಚರಿಸಿದರು. ಇದು ಯಾವುದೇ ಪಕ್ಷದ ಹೋರಾಟವಲ್ಲ, ಪ್ರಕೃತಿ ಮತ್ತು ಜನಜೀವನ ಉಳಿವಿನ ಹೋರಾಟವೆಂದು ಸ್ಪಷ್ಟಪಡಿಸಿದರು. ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ, ಸಚಿವ ಮಂಕಾಳು ವೈದ್ಯ, ಶಾಸಕ ಭೀಮಣ್ಣ ನಾಯ್ಕ ಸೇರಿದಂತೆ ಹಲವರು ಪಕ್ಷಾತೀತವಾಗಿ ಯೋಜನೆ ವಿರೋಧಿಸುವುದಾಗಿ ಘೋಷಿಸಿದರು. ವಿವಿಧ ಮಠಾಧೀಶರು ನದಿಗಳು ತಾಯಿ ಸಮಾನವಾಗಿದ್ದು, ಅವುಗಳನ್ನು ತಿರುವು ಮಾಡುವುದರಿಂದ ಅರಣ್ಯ ನಾಶ, ಕೃಷಿ, ಮೀನುಗಾರಿಕೆ ಹಾಗೂ ಜನಜೀವನಕ್ಕೆ ಭಾರೀ ಹೊಡೆತ ಬೀರುತ್ತದೆ ಎಂದು ಆತಂಕ ವ್ಯಕ್ತಪಡಿಸಿದರು. ಒಟ್ಟಾರೆ, ಪಶ್ಚಿಮಘಟ್ಟಗಳ ಸಂರಕ್ಷಣೆಗೆ ಒಗ್ಗಟ್ಟಿನ, ಅಹಿಂಸಾತ್ಮಕ ಹೋರಾಟವನ್ನು ವಿಜಯ ಸಿಗುವವರೆಗೆ ಮುಂದುವರಿಸುವ ದೃಢ ನಿರ್ಧಾರ ಈ ಸಮಾವೇಶದಲ್ಲಿ ಮೂಡಿಬಂದಿತು.